Ibn Sina Family|أسرة ابن سينا

* لقد فَرِحْنَا بزيارتك كما سيسعدنا كثيراً تسجيلك بالمنتدى
Ibn Sina Family|أسرة ابن سينا

* لقد فَرِحْنَا بزيارتك كما سيسعدنا كثيراً تسجيلك بالمنتدى
Ibn Sina Family|أسرة ابن سينا
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

Ibn Sina Family|أسرة ابن سينا

Ibn Sina Family|أسرة ابن سينا
 
أسرة ابن سيناأسرة ابن سينا  الرئيسيةالرئيسية  أحدث الصورأحدث الصور  التسجيلالتسجيل  دخولدخول  
الرجاء من جميع الاعضاء المساهمة والمشاركة والنشر والرد على المواضيع فى المنتديات المختلفة وذلك حتى نقوم بتعيين المشرفين من الأعضاء النشطاء وكذلك الرجاء من جميع الأعضاء المشاركين معنا فى المنتدى المشاركة كذلك على صفحتنا على الفيس وكذلك تويتر-للإطلاع على شروط الإشراف والتقدم للإشراف إضغط هنا
- أسرة ابن سينا - كلية الطب - جامعة الأزهر - أسيوط -

 

 مقدمة الفارما

اذهب الى الأسفل 
4 مشترك
كاتب الموضوعرسالة
Admin
المدير
المدير
Admin


ذكر
عدد المساهمات : 38
نقاط : 7025
تاريخ التسجيل : 01/08/2012
الموقع : https://isfamily.yoo7.com
العمل : مصمم مواقع ومنتديات

مقدمة الفارما Empty
مُساهمةموضوع: مقدمة الفارما   مقدمة الفارما Emptyالإثنين سبتمبر 03, 2012 6:52 am



بسم الله الرحمن الرحيم
والصلاة والسلام على أشرف المرسلين .... أما بعد ,,,,,,
مقدمة الفارما Pharma
السلام عليكم ورحمة الله وبركاته :
هنتكلم إن شاء الله عن مادة من ألذ المواد اللى درسناها لحد سنة تالتة ....
الفارما بحر واسع جدا ومن الصعب أن تجد شخص حتى لو كان دكتور يبقى ملم بكل شىء فيها لانها باختصار بتمس جميع فروع الطب بلا استثناء حتى الجراحة كمان .... لان اى مرض هتدرسه بعد كده ف الرمد مثلا او ف الباطنة هتلاقى فى Item شبه ثابت ف كل مرض اسمه Treatment ومن هنا جت اهمية الفارما ...

يعنى ايه فارما ؟؟
الفارما هى العلم المختص بدراسة تاثير الادوية على جسم الانسان ... سواء كان التاثير ده شىء كويس ( علاجى يعنى ) او كان شىء مش كويس ( اثار جانبية )
ده باختصار شديد ... وواحدة واحدة ان شاء الله زى ما احنا متعودين هنشرح كل حاجة بالتفصيل الممل جدا
تعالوا نبتدى نفصص التعريف اللى فوق ده عشان نخرج منه بشىء مفيد نفهمه ...
اول جزء ف التعريف بيقول ( تاثير الادوية على جسم الانسان ) .... احنا عرفنا ان التاثير قد يكون علاجى او عرض جانبى ... الكلمة اللى بعدها اللى هى ( الادوية ) معناها ايه ؟؟
طبعا احنا هنتكلم عن المفهوم العلمى الصحيح لكلمة ( دواء ) بخلاف المفهوم الدارج اللى كل الناس فاهماه ... وان كان المفهومين قريبين من بعض الا ان المفهوم العلمى اكثر دقة وشمولية ..
Drug is : A substance that is used for diagnosis , prevention & treatment of diseases
يعنى مادة تستخدم فى التشخيص أو الوقاية أو العلاج
يعنى مثلا احنا بنستخدم بعض الادوية بتستخدم ف التشخيص وهنعرف الحاجات دى بالتفصيل ف المنهج ان شاء الله
و بنستخدم التطعيمات المختلفة للوقاية من بعض الامراض المعدية
وبنستخدم الادوية كمان ف العلاج وده المفهوم الدارج عند الناس كلها ...

طيب نتكلم بقى عن معنى الجملة كلها .... ( تاثير الادوية على جسم الانسان ) معناها ان انا هادى المريض دواء معين وابتدى اشوف تاثير هذا الدواء على جسمه ..
ما مدى استجابة الجسم للدواء ده ؟؟؟ هل تم امتصاصه ؟؟؟ هل الجسم تفاعل كيميائيا مع الدواء ده ؟؟ وهل التفاعل ده نتج عنه مادة جديدة ؟؟ و ازاى الجسم هيتخلص من الدواء ده بعد ما يؤدى مهمته ؟؟

و هل الدواء ده مفيد فى الحالة دى والا لا ؟؟ وايه هى الحالات اللى ممكن ادى فيها الدواء ده ؟؟ و ايه هى الاعراض الجانبية اللى هتنتج عن اعطاء المريض هذا الدواء ؟؟ وامتى اقول ان المريض ده ماينفعش ياخد الدواء ده ؟؟؟

وقبل كل ده لازم ابقى عارف كمان ايه هى طبيعة هذا الدواء هل هو من مصدر طبيعى والا انا اللى مصنعه ف المصنع ؟؟ هل هو حمض ...قلوى والا ايه ؟؟؟
باختصار ( كيمياء ) الدواء هتبقى برده حاجة مهمة بالنسبة لنا ... لكن مش بنفس اهمية تاثير الدواء على الجسم
الكلام اللى فوق ده كلام ملعبك وكله اسئلة مش متجاوبة تعالوا نجاوبها سوا
وهنبتدى من حيث انتهينا ... ( طبيعة الدواء ) ... واحد يقولى هى الكيميا دى ورانا ورانا ف كل حتة ... اقوله ايوة وهتفضل وراك طول عمرك كمان ...
طيب انا عاوز ايه من كيمياء الدواء ؟؟
بص يا سيدى ... اولا وقبل اى شىء لازم تبقى عارف هل الدواء ده من مصدر طبيعى والا مصنع ؟؟
واحد يقولى ما هو معظم الادوية حتى الطبيعى منها بقت بتتصنع ... اقوله كلامك صح بس انا عاوز اعرف المصدر الرئيسى للدواء ... هل الانسان اكتشف وجود مادة معينة ف الطبيعة ليها تاثيرات دوائية والا هو اللى عمل تجارب وسعى لتصنيع المادة دى ؟؟
اظن كده وضحت شوية ... وهتوضح اكتر واكتر لما تقرا السطرين اللى جايين دول
المواد اللى مستخلصة من الطبيعة بتبقى ليها خصائص كيميائية معينة تمكنها من دخول الجسم بصورة اسهل و بتوصل لكل مكان ف الجسم ... يعنى اكثر انتشارا ... يعنى ايه الكلام ده ؟؟
يعنى المواد الطبيعية دى تركيبها الكيميائى بيتيح ليها امتصاص اكثر من الجهاز الهضمى ... ولو اديتها على هيئة حقنة عضلية مثلا بيبقى امتصاصها من مكان الحقن اسرع ... وكمان بعد الامتصاص معظم هذه المواد قادرة على مرور الـــ
Blood Brain Barrier اللى هوا الحاجز اللى حوالين المخ ووظيفته منع مرور بعض المواد الضارة الى المخ ...
واحد يقولى طب وايه المشكلة اذا كان الدواء ده بيوصل المخ والا لأ ؟؟ اقوله المشكلة ان بعض الادوية بيبقى مرورها للــ BBB بمثابة مشكلة بالنسبة للدكتور لان تاثير الدواء ده على المخ ممكن يكون قاتل ... وفى المقابل ... الادوية اللى هى اصلا معمولة عشان تاثر على المخ لازم تتمتع بخاصية مرور الــ BBB ...
اظن لحد كده الكلام واضح ..
نقطة صغيرة كمان بخصوص كيمياء الدواء ... بعض الادوية لازم نبقى عارفين اذا كان حمضية والا قلوية عشان مثلا مانخلطش دوائين واحد حمض والتانى قلوى ف سرنجة واحدة لان كده الاتنين هيتفاعلوا مع بعض وهيعادلوا بعض ويبقوا بلا تاثير على الجسم ... ودى حاجات معينة معدودة على الاصابع ف المنهج
كده يبقى احنا حددنا والحمد لله اول Item هنتكلم عنه ( بعد اسم الدواء طبعا ) فى أى دواء ان شاء الله طول السنة اللى هو
Nature of the drug
السؤال اللى بعده .... ما مدى استجابة الجسم للدواء ده ؟؟؟ هل تم امتصاصه ؟؟؟ هل الجسم تفاعل كيميائيا مع الدواء ده ؟؟ وهل التفاعل ده نتج عنه مادة جديدة ؟؟
بص يا سيدى اجابة السؤال ده احنا لسه قايلنها حالا ف الجزء اللى فات اللى هو طبيعة وكيمياء الدواء ...
الامتصاص ... Absorption
الامتصاص ده درس لوحده وبيعتمد على عوامل كتييييييييييرة اوى هيبقى يشرحها لكم الدكتور احمد درويش فى شابتر الــ General ان شاء الله ... لكن انا هاتكلم عن اللى يهمنا فيه دلوقتى عشان منهجنا
الامتصاص بيعتمد بشكل كبير جدا على طبيعة المادة الممتصة وزى ما احنا عارفين من( الكيميا ) بتاعة السنة اللى فاتت واللى كلكوا نسيتوها ان المواد بتتصنف عند الامتصاص لنوعين ( مواد قابلة للذوبان ف الماء Hydrophilic ) و( مواد قابلة للذوبان ف الدهون Lipophilic ) باختصار المواد الــ Lipophilic هيبقى امتصاصها اكبر بكتير من المواد الــ Hydrophilic وكل ما زادت الــ Lipid solubility كل ما زاد الامتصاص وكمان زاد الجزء اللى هيعبر الــ BBB من الدواء
بالنسبة لقابلية الدواء للانتشار ف اجزاء الجسم المختلفة وقدرته على عبور الــBBB فده اسمه الـــ Distribution

التفاعلات مع الدواء .... Biotransformation
بعد الامتصاص ... احنا عارفين ان الكبد هو اول عضو بيستقبل المواد الممتصة من الجهاز الهضمى ... وده يخلينا نتساءل ... ايه اللى هيحصل للدواء ف الكبد ؟؟
بعض الادوية تمر مرور الكرام لا تفاعلات ولا يحزنون
البعض الاخر يتم تكسيره تماما ف الكبد .. ولا يعبر منه شىء ذو تاثير الى الدورة الدموية الكبرى ... والادوية دى بنحاول ندور لها على سكك تانية غير الجهاز الهضمى زى مثلا الحقن ... بحيث ان انا ادخل الدواء الى الدورة الدموية مباشرة ودون المرور على الكبد اولا و طرق تانية كتير اوى هنعرفها ف المنهج ماتقلقوش ...
بقى لنا ان نعرف المصطلح اللى بيدل على تكسير الكبد للدواء تماما او بنسبة كبيرة ... وده اسمه
First pass metabolism
بمعنى ان ده اول تفاعلات الايض اللى الدواء بيتعرض ليها ف الجسم ...
ملحوظة : الــ First pass metabolism مش بيحصل ف الكبد بس ... ممكن بعض الادوية تتعرض ليه فى جدار الجهاز الهضمى اثناء الامتصاص ..
والمصطلح ده لازم ناخد بالنا منه كويس جدا لانه مهم وهنقابله كتير ف المنهج ... وكمان مهم ف الشفوى
التخلص من الدواء ... Excretion
طب نتكلم بقى عن التفاعلات اللى ممكن تحصل للدواء بعد ما يكون ادى تاثيره على الجسم خلاص والجسم بدا ف التخلص منه .... معظم الادوية بيحصل لها Metabolism ف الكبد ... وبعد كده الجسم بيتخلص منها
وده اسمه الــ Excretion والتخلص من الدواء ممكن يكون من خلال الكليتين ( ف الغالب ) وممكن يكون من خلال الكبد ( مع العصارة الصفراوية ) ....

تعالوا بقى بالراحة كده نلم كل اللى احنا اتكلمنا عنه لحد دلوقتى
احنا اتكلمنا عن اول Item اللى هو Nature of the drug
واتكلمنا بعد كده عن الــ Absorption
Distribution
Biotransformation
Excretion
الاربعة اللى ف الاخر دول كلهم على بعض كده ليهم مصطلح كبير يعبر عنهم اسمه Pharmacokinitics
ايه الـــ Pharmacokinetics دى ؟؟
دى معناها ازاى الجسم بيتعامل مع المادة الغريبة اللى انا دخلتهاله دى ( اللى هى الدواء يعنى )
هل هيمتصها والا لا ؟؟ Absorption
و ايه هو مدى قابلية المادة دى للانتشار ف الجسم ؟؟ Distribution

وايه التفاعلات الكيميائية اللى هتتم بين الدواء والجسم ؟؟ Biotransformation
وازاى الجسم هيتخلص من المادة دى بعد ما تؤدى دورها ؟؟ Excretion
طب ما هو ده اللى احنا اتكلمنا عنه بالتفصيل من شوية صغيرين وفهمناه نقطة نقطة ..
بس انا مارضيتش اخضكوا بالكلمة التقيلة دى من الاول ... وقلت افهمكم المعنى الاول عشان تبقى مستساغة بالنسبة لكم
ولو دققتوا النظر شوية ف الكلمة هتلاقوها بتتكون من مقطعين ... الاول ( ( Pharmaco اللى هو نسبة الى الادوية
والتانى ( ( kinetics اللى هى معناها حركة الدواء داخل الجسم وازاى الجسم بيتفاعل مع الدواء ده ...


Pharmacodynamics

لو تفتكروا من المرة اللى فاتت احنا اتكلمنا عن الجزء الاول فقط من التعريف

الجزء التانى بيتكلم عن الطبيعة تاثير الدواء على الجسم بمعنى اخر ... هل التاثير علاجى نافع ؟؟؟ ام اثر جانبى مضر ؟؟؟

ومن خلال معرفتنا بتاثير الدواء هنقدر طبعا نوصل للحالات اللى ممكن نستخدم الدواء ف علاجها اللى هى استخدمات الدواء = Uses = Indications

وكمان الحالات اللى مينفعش نستخدم الدواء فيها ( موانع الاستخدام )= Contraindications

بسم الله نبدأ

اول حاجة عشان نتكلم عن تاثير الدواء على الجسم لازم الاول نتكلم عن الميكانيزم اللى الدواء بياثر بيه على الجسم


بعض الادوية بتحدث التاثير بطبيعتها الكيميائية زى مثلا الفوار اللى الناس بتاخده لعلاج الحموضة ( طبعا الفوار مش هو علاج الحموضة لكن انا باديكم مثل بس )
يعنى الفوار ده عبارة عن مادة قلوية بتعادل حموضة العصير المعدى ... وبالتالى بيدى الشعور بالارتياح


بعض الادوية بتشتغل من خلال طبيعتها الفيزيائية ... ازاى يعنى ؟؟

يعنى مثلا الادوية المستخدمة ف علاج الاسهال ممكن تبقى عبارة عن مادة ليها خصائص فيزيائية تمكنها من ادمصاص ( امتزاز ) = Adsorption السوائل اللى ف الجهاز الهضمى فتمنع الاسهال

وفى اساليب كتيرة جدا ممكن الدواء من خلالها يحدث تاثيره( هيبقى د/ احمد درويش يشرحها ف الجنرال بالتفصيل ان شاء الله )

لكن الاهم على الاطلاق هو الاتى

معظم الادوية بيحدث تاثيره من خلال الارتباط ببعض المستقبلات =Receptors اللى بتبقى موجودة على سطح الخلية من بره ... واظن ان احنا عارفين الكلام ده من ايام الاندوكرين السنة اللى فاتت

طبعا انا مش محتاج اتكلم معاكم عن طبيعة المستقبلات او اقول انها جزيئات ضخمة من البروتين المرتبط ف بعض الاحيان بالكربوهيدرات = Glycoprotein وانها موجوده على سطح الخلية او انها مسؤولة عن الارتباط ببعض المواد الكيميائية اللى موجودة ف الجسم ....

وكمان مش مضطر اقول ان ارتباط المواد الكيميائية ( سواء كانت هورمونات او ادوية ) بيحدث تغييرات فى تركيب وشكل المستقبلات يؤدى بالتالى الى تغييرات داخل الخلية
ولا محتاج اتكلم معاكم عن انواع المستقبلات وكيفية عملها بالتفصيل الممل

لان انا عارف انكم اساتذة ف الكيميا .... صح ؟؟

ع العموم هى موجودة بالتفصيل ف الجنرال ( ربنا يكون ف عونك يا احمد )

انا كده اتكلمت عن المعلومات اللى احنا هنحتاجها دلوقتى بس

كد يبقى احنا اتكلمنا عن اول Item ف الـــ Pharmacodynamics اللى هو

Mechanism of action of the drug

طبعا انا لو عارف ازاى الدواء هيشتغل .... او على اى مستقبل هيشتغل هاقدر ببساطة استنتج او اتوقع التاثير اللى الدواء هيعمله ..... يبقى ده اسمه ايه ؟؟؟

صح ... اسمه Action of the drug وده Item مهم جدا ... ليه ؟؟

لان انا لو عارف ايه الــ Action of the drug هاقدر ببساطة اعرف الحالات المرضية اللى ممكن استخدمه فيها..... ازاى يعنى ؟؟

يعنى مثلا فى عيان عنده ورم ف Adrenal medulla اللى هى بتفرز الادرينالين والنورادرينالين ... يبقى انا هاستخدم دواء يقفل المستقبلات بتاعة الجهاز العصبى السمبثاوى اللى كانت الفا وبيتا ( الله يرحم الاتونوميك كانت ايامه حلوة ) ... وبالتالى لو انا فعلا قفلت المستقبلات يبقى انا منعت اى تاثير من الادريناين اللى خرج زيادة من الغدة .... اظن كده الكلام سهل وواضح

يبقى نفصص المثال ده بالراحة ونطبقه على الكلام اللى احنا قلناه لحد دلوقتى ...

اولا : Mechanism ofaction of the drug
احنا قلنا ان الدواء ده هيشتغل من خلال قفل المستقبلات

ثانيا :Action of the drug
قفل هذه المستقبلات هيمنع تاثير الادرينالين الزيادة عليها .. صح ؟؟ يبقى التاثير هيكون عكس لجميع تاثيرات الادرينالين على اى مكان فيه المستقبلات بتاعته
يعنى اذا كان الادرينالين بيعمل زيادة فى ضربات القلب يبقى المريض اللى هيستخدم الدواء ده هيبقى عنده بطء فى ضربات القلب

ثالثا : الاعراض الجانبية Side effects
قفل المستقبلات دى هيبقى فى كل اجزاء الجسم تقريبا ... يعنى انا تقريبا هالغى تاثير الجهاز السمبثاوى ف اماكن كتير ... اهمها على سبيل المثال هيبقى القلب والاوعية الدموية ... ساعتها يبقى انا هاتوقع ان المريض اللى بيستخدم دواء بيقفل المستقبلات دى لازم هيعانى من انخفاض ضغط الدم بالاضافة الى بطء ضربات القلب

رابعا : الاستخدمات Uses
من خلال التاثير اللى الدواء هيعمله ( اللى هو قفل المستقبلات ) هاقدر استنتج او اتوقع ان انا هاستخدمه ف اى حالة ممكن يكون فيها زيادة فى افراز الادرينالين من الغدة او زيادة مثلا فى نشاط الجهاز العصبى السميثاوى

خامسا : موانع الاستخدام Contraindications
برده من خلال معرفة تاثير الدواء على الجسم هاقدر احدد الحالات اللى ماينفعش استخدم فيها الدواء ...

اظن كده الامور بقت اوضح بكتير عن قبل كده

يبقى نحدد الــ Items اللى احنا وصلنا ليها

Pharmacodynamics
=
Mechanism of action
Actions of the drug
Side effects
Uses
Contraindications

قوم هات ورقة وقلم بقى عشان نلخص المقدمة كلها ف كام سطر هتحطهم على الحيطة قدامك وانت بتذاكر طول السنة


اكتب ورايا

Drug
=

Nature of the drug
معلومات عن طبيعة ومصدر الدواء

Pharmacokinetics
معلومات عن تاثير الجسم على الدواء

Absorption
Distribution
Biotransformation
Excretion



Phamacodynamics
معلومات عن تاثير الدواء على الجسم

Mechanism of action
Actions of the drug
Side effects
Uses
Contraindications

اى دواء هنشوفه طول المنهج ان شاء الله لازم نتكلم عن كل نقطة من النقط السابقة

وبعض الادوية بتبقى مثلا من نفس المجموعة او ليها نفس الخصائص عشان كده بندرس دواء واحد منها ف الغالب بيبقى هو اول دواء تم اكتشافه ف المجموعة وبعدين بنتكلم عن الفروق والاختلافات اللى بينه وبين باقى ادوية المجموعة ان شاء الله

ممكن لو تحبوا تعملوا موضوع لاستفسارات الفارما وابقى اجاوب على اى سؤال تحبوا تسالوه

فى حفظ الله
دمتم سالمين
الرجوع الى أعلى الصفحة اذهب الى الأسفل
https://isfamily.yoo7.com
Abada Sakr

Abada Sakr


ذكر
عدد المساهمات : 21
نقاط : 4488
تاريخ التسجيل : 08/08/2012
العمر : 31
العمل : كلية طب أزهر أسيوط-الفرقة الثالثة

مقدمة الفارما Empty
مُساهمةموضوع: رد: مقدمة الفارما   مقدمة الفارما Emptyالثلاثاء سبتمبر 11, 2012 8:31 am

[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
محمد محمد نبيل حامد
نائب المدير
نائب المدير
محمد محمد نبيل حامد


ذكر
عدد المساهمات : 48
نقاط : 6461
تاريخ التسجيل : 06/08/2012

مقدمة الفارما Empty
مُساهمةموضوع: رد: مقدمة الفارما   مقدمة الفارما Emptyالثلاثاء سبتمبر 11, 2012 10:47 pm

[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
الطبيب الماهر




عدد المساهمات : 3
نقاط : 4291
تاريخ التسجيل : 08/08/2012

مقدمة الفارما Empty
مُساهمةموضوع: رد: مقدمة الفارما   مقدمة الفارما Emptyالأحد سبتمبر 23, 2012 2:45 am

جزااااااااااااااااال الله خيرااااا
اا
الرجوع الى أعلى الصفحة اذهب الى الأسفل
 
مقدمة الفارما
الرجوع الى أعلى الصفحة 
صفحة 1 من اصل 1
 مواضيع مماثلة
-
» " البارا " .... مقدمة تمهيدية لطلاب الفرقة الثالثة
» المفاصل Joints (للطلاب القبلين على أولى طب إن شاء الله جزء من مقدمة التشريح بالعربى)

صلاحيات هذا المنتدى:لاتستطيع الرد على المواضيع في هذا المنتدى
Ibn Sina Family|أسرة ابن سينا :: 3rd Year :: Pharmacology-
انتقل الى: